"Плитаға қараусыз қалдырылған тағам — өрт қаупінің көзі"

Көпқабатты тұрғын үйлерде ас әзірлеу кезінде тағамды қосулы плитада қараусыз қалдыру өрттің шығуына және адам өміріне қауіп төндіруі мүмкін. Кәдімгі ұмытшақтықтың өзі ауыр зардаптарға әкелуі ықтимал.

Тағамның күйіп кетуі салдарынан пәтер түтінге толып, улы жану өнімдері адамдардың денсаулығына зиян келтіреді. Оттың перде, жиһаз және басқа да тез тұтанатын заттарға таралу қаупі бар. Ал көпқабатты үйлерде түтін көрші пәтерлерге де тарап, тұрғындардың өмірі мен қауіпсіздігіне қатер төндіреді.

Өрттің алдын алу үшін не істеу керек?

- Тағамды плитада қараусыз қалдырмаңыз.

- Ас әзірлеу кезінде үйден шықпаңыз және ұйықтап қалмаңыз.

- Плита маңына сүлгі, қағаз және басқа да тез тұтанатын заттарды қоймаңыз.

- Шаршаған немесе өзіңізді жайсыз сезінген жағдайда ас әзірлеуді кейінге қалдырыңыз.

- Өрт белгілері байқалса, адамдарды қауіпсіз жерге шығарып, 101 немесе 112 нөміріне хабарласыңыз.

Заң талаптары және жауапкершілік

Қазақстан Республикасының өрт қауіпсіздігі қағидаларына сәйкес, ғимараттар мен тұрғын үйлерде дайындалып жатқан тағамды қараусыз қалдыруға жол берілмейді.

ҚР Әкімшілік құқық бұзушылық туралы кодексінің 410-бабына сәйкес, өрт қауіпсіздігі талаптарын бұзғаны үшін жеке тұлғаларға ескерту жасалуы немесе 5 айлық есептік көрсеткіш (АЕК) мөлшерінде айыппұл салынуы мүмкін. Құқық бұзушылық бір жыл ішінде қайталанса, айыппұл мөлшері 10 АЕК-ке дейін артады. Егер өрт салдарынан адамның денсаулығына зиян келсе немесе елеулі материалдық залал туындаса, заңда көзделген қосымша жауапкершілік қарастырылған.

Құрметті тұрғындар! Өрт қауіпсіздігі ережелерін сақтау — әр адамның міндеті. Плитадағы тағамды қараусыз қалдырмаңыз. Сіздің жауапкершілігіңіз өз отбасыңыздың ғана емес, көршілеріңіздің де өмірі мен қауіпсіздігін сақтауға көмектеседі.

Дина Досжанова

Ақтөбе қаласының ТЖБ бас маманы