Әкім, автобус қайда?!

Жыл басынан бері Хромтау - Ақтөбе  бағытында жүретін   автобустар саны күрт азайды. Сағат сайын  үзбей қатынайтын автобустардың  бірден азаюын   тұрғындар   жеке серіктестіктің жаңа иесімен байланыстырса,  кейбіреулері осындағы ескі  автобустың    ескіруімен байланыстырады.

Бейбіткүн КАМЕТИЯҚЫЗЫ

kerekinfoaktobe@gmail.com

Хромтаудың халқы алаңдап отыр. Өйткені, облыс орталығына қатынайтын автобустар саны күрт азайған. Есесіне таксистердің саудасы жүріп тұр. «Саяхат» автовокзалының ескірген автобустарының уақытында жүрмей қалуын пайдаланып, таксистер жүру ақысын көтеріп жіберген. Ал Хромтау кішкентай ауыл емес. Облыс орталығына қатынайтындар саны көп және көбісі жұмыс үшін қалаға келеді. Ал күзде Хромтаудан қалаға қатынайтын студенттер де бар.

               -  Осы жерде жылдап тұрып келемін. Ауданның қалай өзгеріп келе жатқаны, қандай мәселесі барын  бәрін  бір кісідей білемін. Ауданда алғаш осы автовокзалды ашқан жеке кәсіпкер Асылбек Егізбаев еді. Оның  кезінде автобустар сағат сайын,  тіпті әрбір 40 минут сайын қатынайтын. Осы жаңа иесі пайда болғалы автобустар  саны азайып, қалаға кейбір күндері 3-4 рейс   ғана тасымалдауға шығатын    болып жүр. Себебін сұрағанымызда,  автобустарының істен шығып,  жөндеуде тұрғандығымен  түсіндірді.  Осылай бірнеше сағат автобусты күтуге уақытымыз болмай,  таксиге амалсыз мініп кетеміз. Бұрын  автобустар үзбей қатынап жүрген кезде               таксилер  адам  басына 1000 теңгеден алатын.  Енді жол ақысын  1500-2000 теңгеден төлейтін  болдық.  Осылай такси иелері қалтамызды қағып тұр.  Автобустың  уақыты  ретке келгенше,  жеке көлік  иелеріне бағаны көтермей тұрақты жол ақысын  қойып,  әкімшілік неге қадағалап отырмайды екен? Ойларына келген бағаны айтып жүрген таксилерге тосқауыл қойылса деймін,-дейді Хромтау ауданының тұрғыны Ұлболсын   Маңғалова. Халық осылай дейді. Хромтау-Ақтөбе бағытына автобус шығаруға тиіс «Саяхат» автовокзалының автобустары жиі бұзылатындықтан, халық екі есе баға төлеп, қалаға таксимен қатынауға мәжбүр. Жергілікті әкімшілік   бұл жағдай туралы бас қатырып  отырған жоқ.   Таксилердің жеке адамдар екендігін айтып, тосқауыл қоюға  шамалары жетер емес. Осыған  дейін де тұрғындар тарапынан әлеуметтік желілерде  осындай мәселе көтерілген. Біз автовокзалдың басшысына шығып,ол кісімен сөйлесіп,  мән жайды білдік. «Саяхаттың»  автобустары ескірген, жиі бұзылып, істен шығып қалатынын,  болашақта жаңа автобустар сатып алғысы келетіндігін жеткізді.  Тіпті басқа жеке  автобустармен байланыс жасап, жүргізуге келісім беретіндіктерін айтты. Бүгінде жаңа автобустар сатып алуға қаржыларының аз екендігін айта келе, субсидия  алу жолдарын  қарастырып жатыр. Тұрғындар арасында такси бағасының қымбаттауна наразы екендігін  білеміз. Алайда, олар жеке автокөлік иелері болғандықтан, жай ескертулер берілді,-дейді Хромтау аудандық тұрғын  үй-коммуналдық  шаруашылық, жолаушылары көлігі және    автомобиль  жолдары  бөлімінің    басшысының міндетін атқарушы  Есет Мұхаметқали.

Аудандағы автобустың мән –жайын өз көзімізбен көрдік. «Саяхаттың» ішінде автобус күткен адам көп. Ал сыртында автобус болмады. Автовокзал қызметкерлері басшының қазір орнында жоқ екенін айтып шығарып салды. Ал халықтың осындай мұқтаждығын көрген такси жүргізушілері бағаны екі есе өсіріп, облыс орталығына адам тасып жатыр. Бірі жұмысынан, бірі басқа шаруасынан қалғысы келмеген тұрғындар таксимен қатынауға келісетіндерін айтты.